洗腦＋荼毒心靈之作，重要有三部曲。（當然【魔戒三部曲】更值得睇。）
朋友提及呢本人氣“毒”物【秘密】 ，剛好響內地見到簡體版，人民幣32蚊, 佢就好奇買黎睇睇，我亦好奇借黎望望。（本來就對心靈雞湯、自我改進呢類野無什好感，因為見被洗腦既人遠多於成功例子，正如傳銷一樣。睇，只為拆佢招牌。哈哈哈哈）
睇左兩頁（其實唔止兩頁，本人不斷隨意打開黎睇，試圖俾機會佢）已經覺得妖言惑眾，果然，常識經學術性包裝後，廢話都變真理係必勝方程式。例：如果你需要錢，就會吸引到錢。
大佬，去到飯都無得開／要訓街／俾人追數既絕境, 諗辦法死掂佢是常識吧？！
什麼吸引力法則，只係睇中左人懶既弱點，不斷叫人自我催眠而產生可不勞而獲既錯覺。
其實你有自信、正面性格、目標、勇氣、行動力，自不然達到目標....你信唔信巴菲特李嘉誠周潤發etc都只係齋坐？霍金都要花時間探索一下黑洞吧？？連少少時間都唔想下功夫去改進、做好自己，咁憑咩得到想要既野？想高薪厚職唔洗點做 ，都要花d時間埋下堆，巴結一下有關人士卦？服待大劉，甘比都要(扮？)賢賢淑淑；最重要一點------你老細都重要番工啦。
心靈雞湯類既野，的確歪理多於真理，向迷茫脆弱既人洗腦，簡直易如反掌 。
而且好興只叫你用另一角度去睇個問題....ok, 做人係要多角度去睇件事，睇野先闊，但呢個係兩個課題既事：
1. 從問題中睇到得著，不至於只睇到最差既野
2. 點樣解決問題
問題唔會因你換左角度去睇而消失，你要做既野係，清楚認清個源頭同自己，先可以堅強地面對並解決佢。否則，只係自欺欺人，問題依舊，心靈無健康過之餘，重病過以前。
試過響外地，半夜同朋友等的士。條大街鬼影都無隻，等左十幾分鐘都只有零零星星既車行過。開始唔耐煩之際，友人突然認真地講左句：「吸引力法則，好快就會有的士。」當時好想用四個字回應佢：「病入膏肓。」(佢都錯唔晒既，我都唔信等到天光都無的士～)
書中又提到（大約意思）唔可以有半點負面諗法出現，否則會削弱此法則既效果云云；
簡直係誤導。你要教人有正面思想點解唔直接講？Think positive唔等於要igone所有失敗既假設；唔諗埋最壞既情況，又點得黎兩手準備去應變？
遇過呢類信到十足十既人，邏輯，梗係無；思路，當然唔清晰兼矛盾處處；功夫最到家係自圓其說。最慘係當時人用自以為得佢地知道既所謂真理，高姿態地“教導”人，根本無切身處地用心聽你既說話， 只係先入為主咁用真理去judge你.....嚴重性比無知婦孺更嚴峻。
醉心傳銷既人幾時先醒呢？通常入左一大堆貨又散唔去果陣。
但沉醉雞湯既人可能永遠都唔會醒，因為無貨響手，永遠唔會有事實一巴車醒佢地既一日。
可憐又可悲，大家點解咁無自信，只要有個XX學者專家博士.....講兩句就照單全收，丁點質疑都無？
一直相信人係生，規矩係死。理論唔係100%適用於每件事上，否則同讀死書無分別。
最成功應該係書名【秘密】﹣﹣一個永遠能夠挑起人類好奇心既不敗詞語，重要包晒膠唔俾人試閱，絕！若果好似佢既宣傳語句話齋“全球最具精神影響力書藉”，而又真係有咁多人俾佢洗左腦，地球滅亡既日子不遠矣！
(* 作者應該晨早發左達)
